LAJENÈS LAVNI W NAN MEN W

LAJENÈS LAVNI W NAN MEN W

Nan tout peyi sou latè, kote dirijan ap panse, yo konsidere lajenès tankou yon fòs. Yon fòs ki enspire lespwa. Yon lespwa ki ka pèmèt yon landemen miyò. Se pou sa leta nan gran peyi, kote dirijan ap panse, yo mete bon jan ankadreman ak èstrikti pou jèn yo. Bon jan ledikasyon pouki sèvi yo. Paske menm jan yon plant bezwen dlo pou owoze l pou l ka rete bèl , djanm anfòm, se konsa tou yon peyi bezwen jenn li yo pou l kapab rete fò, djanm pisan epi pwospere.

Jèn ou pa dwe dekouraje menm si nan peyi nou pa gen lekòl ak inivèsite pou tout jenn fanm ak jenn gason. Sa pa dwe fè nou dekouraje si nou vle mete konesans nan tèt nou, menm si kondisyon yo pa reyini pou nou etidye menm jan ak yon ti ameriken, menm lè nou pa gen ase manje, nou pa gen bibliyotèk, nou pa metrize teknoloji a ase ak yon pil lòt pwoblèm ankò, nou dwe toujou rete kwè nan rèv nou. Se pou nou kondisyone lespri nou nan bagay ki pozitif, pandan n ap etidye ki èstrateji pou nou pase pou nou kraze sistèm peze souse a, kote chodyè a kontinye ap bouyi yon sèl bò.

Jèn gason ak jèn fanm kenbe karaktè nou paske apre lapli fin tonbe, solèy la toujou la pou briye. Se pou nou toujou kenbe diyite nou, paske nan yon peyi tankou peyi Dayiti se nou ki fòs la.

Se pou nou chèche bon modèl yo pou nou swiv. Se pou nou kòmanse kopye sou sa ki bon. Pa adapte nou ak sa ki pa bon. Pa akomode nou ak sa k ap mennen nou nan pèdisyon. Direksyon nou dwe pran an se direksyon ki ka pote solisyon ak pwoblèm nou yo, pou demen timoun k ap vini yo pa mande nou kisa nou t ap regle. Atache nou ak bon tradisyon yo pandan n ap rechte tout sa ki pa bon yo.

Jounen jodi a gras ak teknoloji enfòmasyon yo, nou ak kontak ak tout sa k ap fèt nan lemonn, tout pwogrè , nan tout domèn. Mwen vle egzote nou pou nou itilize yo nan enterè nou, paske enterè n se yon landemen miyò k ap debouche sou Ayiti nou vle a.

Toujou kenbe liv nou, "kraze bèt" nou pou demen n ka vin bèl. Konsa yon lòt Ayiti n ap reve a ap tounen yon reyalite. Ayiti nou vle a va sa tout bon vre, men fòk depi jodi a nou menm lajenès nou kwè nou se yon fòs. Konsa chenn ki mare lespri n nan va kase. Aprann sa tande ou menm, ou menm ou se yon fòs menm lè bagay yo rèd.

Pa bliye se nou ki envante lalibète, nou se premye pèp nwa ki endepandan sou latè, an n trase pwòp chimen nou ,pandan n ap kraze tout barikad ki anfas nou.

Lajenès pa gaspiye tan n ,ann fè pou priyorite nou bagay ki enpòtan. Pa kite moun pase nou nan tenten, pa okipe sa  moun  ap di sou nou, se nou menm sèl ki ka fè diferans la, paske lavni w nan men w. Kenbe diyite w pou demen ou pa di si w te konnen.

Moun ki ekri tèks sa se:
Joanès, JEAN